पशुपालकांसाठी शासनाच्या विविध योजना

www.ah.maharshtra.gov.in या संकेतस्थळावरून

--------------------------------------

ठाणे : जिल्हा परिषदेच्या पशुसंवर्धन विभागाच्या वतीने केंद्र पुरस्कृत राष्ट्रीय पशुधन अभियान ( NATIONAL LIVESTOCK MISSION  ) राबविण्यात येत आहे. या अभियानाचा पशुपालक, शेतकरी समूह गट, महिला बचत गट व उद्योजक तसेच पशुसंवर्धन विषयक व्यवसाय करणारे शेतकरी यांना ५० % अनुदानावर विविध योजनेचा लाभ घेता येणार आहे. यासाठी www.ah.maharshtra.gov.in या संकेतस्थळावर ऑनलाईन पद्धतीने अर्ज करण्याचे आवाहन जिल्हा परिषदेच्या अतिरिक्त मुख्य कार्यकारी अधिकार डॉ.रुपाली सातपुते यांनी केले आहे. तसेच पशुधन व कुकूट वंश सुधारणा, पशुखाद्य व वैरण विकास ,आणि नावीन्य पूर्ण संशोधन व विस्तार हे तीन उप अभियान देखील जिल्हात राबविले जात असून लाभार्थ्यांना ऑनलाईन अर्ज भरून या योजनांचाही लाभ घेता येणार आहे. 

 पशुधन व कुकूट वंश सुधारणा उप अभियान

या  उप अभियानातर्गत कुकूटपालनातून प्रजाती विकासाद्वारे उद्योजकता विकास करण्यासाठी पशुपालकांना ५० % अनुदानावर कमीत कमी १००० देशी पक्षी संगोपन व अंडी उबवणी केंद्राची स्थापना करण्यासाठी २५ लक्ष पर्यत अनुदानाची रक्कम पशुपालकांना मिळणार आहे. तसेच शेळी- मेंढी पालनातून प्रजाती विकासाद्वारे उद्योजकता विकास करण्यासाठी पशुपालकांना कमीत कमी  ५०० शेळी व २५ बोकड गट स्थापन करण्यासाठी ५० %  भांडवली अनुदान मिळणार आहे. त्याचबरोबर वराह पालनातून उद्योजकता विकास करणेसाठी १०० मादी अधिक २५ नर वराह गट स्थापन करण्यासाठी पशुपालकांच्या प्रकल्पानुसार ३० लक्ष पर्यत अनुदान मिळणार आहे. 

 पशुखाद्य व वैरण विकास  उप-अभियान  

            केंद्र शासन पुरस्कृत राष्ट्रीय पशुधन अभियानातील पशुखाद्य  आणि वैरण विकास या उप अभियानातर्गत गुणवत्ता पूर्वक बियाणे उत्पादन आणि पशुखाद्य उद्योजकता विकास करणे या बाबींसाठी प्रकल्प किमतीच्या ५० % पशुपालकांच्या प्रकल्पानुसार ५० लक्ष पर्यत अनुदान मिळणार आहे.  या योजनेमध्ये मुरघास बेल , वैरणीच्या विटा आणि टी .एम .आर निर्मितीसाठी दोन टप्यामध्ये एसआयडीबीआय मार्फत अनुदान मिळणार आहे .

 नावीन्य पूर्ण संशोधन व विस्तार उप- अभियान 

 या उप अभियानातर्गत नाविन्यपूर्ण संशोधन, विकास, विस्तार, उपक्रम, आणि पशुधन विमा यासाठी केंद्र व राज्य शासन अर्थ साह्य करणार आहे. अनुसूचित जाती, अनुसूचित जमाती आणि दारिद्र रेषेखालील पशुपालकांना ०५ कॅटल युनिट ( शेळी -मेंढी , वराह व ससे वगळून ) साठी केंद्र व राज्य शासन अर्थ साह्य करणार आहे. या सर्व  योजनेविषयीची सखोल माहिती करून घेण्यासाठी पशुसंवर्धन विभागाच्या  www.ah.maharshtra.gov.in   या अधिकृत संकेतस्थळा  भेट द्यावी किंवा  नजीकच्या पशुवैद्यकीय संस्था प्रमुख , पशुधन विकास अधिकारी (विस्तार) पंचायत समिती यांचेशी संपर्क साधण्याचे आवाहन जिल्हा पशुसंवर्धन अधिकारी डॉ. किर्ती डोईजोडे यांनी केले आहे.

--